Cafe Siam (The Plaza ) (已結業)

好耐都冇写食评，今次真系忍唔住要写一写，其实呢间餐厅都开咗好多年，我都帮衬左好多次，对上一次应该系上年年尾，𠮶阵时仲未咁差，今次经过E 网订枱，有折扣，相信同时间就坐的人都应该系透过呢个网去订枱有折扣，星期日的下午人很多，可惜服务员只得三四个，服务员的态度也一般，可能人多的关系开始做到有啲烦，其中有一个年青的女孩态度真的不敢恭维，见佢不停跑来跑去，但系其实效率一般唔见得特别快，仲要打烂野，其实有时候反而唔做折扣，服务和食物质素应该会更好，始终人客太多做唔切。柚子沙律，味道一般很淡，但柚子新鲜。 冬阴公，不酸也不辣，只虾明显系极度唔新鲜，啲肉好梅，但系尚算多料。炒椰菜仔，一个字！冇味！菜很老。小食拼盘，真心讲啲嘢食应该系炸定，春卷同虾饼是冻的，香叶鸡几好食，最有趣系串烧，灵魂酱汁花生沙嗲酱竟然冇俾我哋，但我见佢哋好似好忙所以都算数，食晒成碟之后个侍应竟然攞个串烧汁上来，然后说sorry，都已经食晒仲攞嚟做乜。。。蛋网炒金边粉，好明显系因为时间关系，说好的蛋网，变了一块老蛋皮。。。本来一间很好的餐厅竟然变成咁，真系好可惜，中环区我最钟意食呢间泰国菜，希望唔好为咗做折扣客，拖低晒食物质素。