祥興記上海生煎包 (已結業)

5月初新开张的时候见到门口人山人海已经想试，但又唔想花时间等，到今晚揾食见到不用等位，所以今日会一会呢个生煎包，睇吓系咪如食评中咁好食。我去到时已有半盘煎好既放咗系度，所以一坐低就有得食。虽然无即叫即煎既咁热，但还是依然热的。我之前食过既生煎包，系一个包既size，但呢度只系比云吞大小小，属于精致版。个底煎得香脆系生煎包既特色，呢度做得到。咬开之后，个皮系好薄，但底部太厚。包入面有好多汤汁，我特登倒出唻睇吓有几多，都有一个半汤匙咁多架。馅料方面，只有猪肉，似乎单一咗啲，而且啲肉唔系打成肉酱，而系打成肉蓉，毫无咬劲。开头都觉得个包几香脆都ok，但食咗二个之后开始顶唔顺，因为个馅真系唔系好得，我只系食到白芝麻既香同汤汁既咸味，完全食唔到肉味。我再点小小醋唻食，先至觉得有返啲味道。唔知系咪因为有期望，所以对佢要求高啦，我觉得普普通通啦。