スーパー丼 (駱克道) (已結業)

都有一段时间冇去专食丼饭既餐厅，今次嚟咗大热店「Superdon」。环境系正铜锣地铁站对住既骆克道，地理位置十分方便，餐厅设计以白色做主调，比较清新。餐牌唔止刺身类既丼饭，仲有热食丼、小食、串烧、单点刺身，种类唔会单一。特上北海道丼 $198包括帆立贝、三文鱼籽、海胆、吞拿鱼腩蓉及油甘鱼，仲附有青瓜及味噌汤。丼既份量唔算好大碰，相信女士们都应该能够食得哂，每款刺身都系两件，帆立贝几嫩口，质素可以；三文鱼籽、海胆都新鲜，唔会有腥味，仲几鲜甜，捞饭再加捞甜豉油一流；而吞拿鱼腩蓉及油甘鱼相对上就比较逊色啲，望落去色泽冇咁亮丽，吞拿鱼腩蓉唔算好香，油甘鱼油脂唔够，整体平庸。滑蛋亲子丼 $68即滑蛋鸡肉丼，叫左一个刺身丼，另一个就叫左熟食，拣左滑蛋鸡肉，同样附有青瓜及味噌汤。份量比较多，滑蛋做得几嫩，鸡肉亦不少，加上蒽碎、洋葱、芝麻，食落味道会丰富啲，再加豉油，食哂成碗绝对唔系问题！总括而言，刺身丼还可以，不过我觉得唔一定叫“特上北海道丼”呢个价位既刺身丼，因为都比较贵，可以食返好似“三文鱼亲子丼”、“火炙三色丼”等等呢一类，价钱都比较平啲，而熟食丼就几高质，下次再帮衬会再试其他熟食丼。