樂天經典 (已結業)

乐天经典有惊喜尖沙咀新开咗间乐天经典，见到佢有胡椒蟹，梗系要试啦！先叫咗几个头盘同小菜，再叫个古早鱼香老鼠粉煲同星洲黑胡椒蟹。先嚟个泰式凤爪，去骨嘅凤爪一入口系酸酸甜甜嘅，个酸味唔系其他地方食到嘅醋嘅酸味，似系果酸嘅酸味，唔会好刺激，入口系好舒服嘅，再有少少甜，之后个辣味就出嚟喇，味道好有层次，都不错呀。马拉盏空心菜食落几有镬气呀，有马拉盏嘅香同微辣，空心菜又好爽脆。到老鼠粉喇！一嚟到就已经好香，见到粉嘅中间有一个生蛋黄，侍应帮忙将少少嘅咸鱼同柠檬汁拌匀再加入个煲度，捞匀就食得喇！加咗咸鱼之后真系好香，但系又唔会太抢㖞，入面材料都好丰富，有菜脯，虾仁同椰菜花。老鼠粉熟度刚刚好，再加埋菜脯嘅口感，又有蛋花同咸鱼香，唔错。虾仁又好爽口，加入柠檬汁令到个粉唔会好腻，再食多碗都得。另一主角胡椒蟹登场喇！见到都流口水，只肉蟹都几大只。急不及待攞个蟹钳食，一开个壳见到肥美嘅蟹肉，好juicy，食落去食到胡椒嘅香辣惹味之外，仲食到蟹肉嘅鲜甜。胡椒嘅香唔单单喺表面，食到个蟹肉都入晒味架。个黑胡椒蟹真系不错，食咗半只仲想再食呀！