隱日本料理 (已結業)

到访呢间2019年已经开业嘅餐厅。我同朋友大约晚上7点黎到，全间餐厅只有我同朋友两个人。心里面多少有啲觉得奇怪，但仍然照坐低。睇一睇餐牌，价钱同地理位置一样非常高级。当晚，我哋叫咗两份龙虾同飞驒牛嘅铁板烧餐。食物质素嚟讲，食材系贵价，选用澳洲南龙虾同日本飞驒牛，食物都非常新鲜。龙虾肉质弹压。牛肉方面，我地选择一份西冷同薄烧牛肉。西冷五成熟，肉质扎实，唔鞋口，但就太油。薄烧牛肉里面包住蒜同葱，不会食落唔够香。摆盘都算精美。但整体黎讲冇咩惊喜，而且整个套餐食落嚟，觉得好油腻。饱腹感有八成，但当中有两至三成系因为太油，所以觉得好滞。最后个甜品亦系最失望，只系俾咗几旧蜜瓜同埋哈密瓜加几粒蓝莓。说实话，比得一个相对高嘅价钱，餐厅系咪应该提供返一啲自家制嘅甜品搭配时令生果？如果只系需要普通果盘，我去酒楼食都有啦。呢个位我觉得完全唔配合食物嘅价钱同餐厅嘅地理位置。餐厅嘅厨师表示佢地有落广告，请传媒宣传餐厅。但整晚都系得我同朋友，及另一枱情侣客人。如果真系想出奇制胜，餐厅要考虑一下调整个餐嘅搭配，先对得住比呢个价钱嘅客人。如无意外，应该唔会再翻转头食第二次。