雲長小龍坎老火鍋 (已結業)

曾经系国内食过小龙坎,味道服务各样都唔错,唔知香港呢间系唔系同国内属于同一个集团,见到佢午市有一人一锅就去试下。佢嘅位置位于酒店入面,熟悉尖沙咀嘅就唔难揾。君怡酒店本身都比较多内地人住,我中午1点入到去有几枱客喺度,大部分都系讲普通话,而侍应第一句同我讲嘅都系普通话。 不过呢度人手真系好不足,虽然客人唔多,但系我都企咗几分钟先侍应出黎带位。呢度Lunch做紧一人一锅,$68-88好抵,有四种汤底可以拣,当然呢个价钱唔好想像食材会有几高级,而我都系打算嚟试佢嘅麻辣汤底 牛肉偏肥,冇乜牛味。水饺&虾丸(自选款式各一粒),虾丸系手打既,好味,水饺亦新鲜。其他既定配料包括有粟米,午餐肉,豆腐,枝竹,冬菇,萝卜,蟹柳,娃娃菜。所有食物都正正常常,而且仲可以拣一款面食,份量十足。麻辣汤底做得几好,唔够香但系够麻够辣。午餐仲包括一罐饮品(各款汽水/加多宝),好抵。美中不足嘅系呢度嘅服务,人手唔够,亦无乜服务可言,畀钱嘅时候佢仲找咗20蚊散纸畀我,其实我本身唔介意,不过侍应一句唔好意思都冇,我就觉得呢啲态度唔应该系酒店出现。