程班長台灣牛肉麵 (已結業)

响公司OT完，正想著是否又去蛇王二，见程班长唔驶等位，就俾次机会佢吧。一进门，待应的招呼好一般，店内九成满，安排坐门口第一个位，张櫈唔系几好坐，可能梳化果边会好啲，可惜俾个自由行女仕嘅战利品霸咗。Scan下个餐牌有咩吸引，发现除咗台式食品，仲夹杂咗好多其他选择，结果点咗个似系招牌菜嘅「红烧三宝面」，意犹未尽，见有卤水大肠，姑且一试啦。先上嘅系大肠，肥嘟嘟胀卜卜，未食都知好味，一试果然唔错，最正系肠中有肥膏，好好味！有一点不满系已落辣油，唔食辣嘅朋友要留意。仲有如果份量多50%就perfect啦。跟著上面，都几大碗，细食嘅未必食得晒，三宝有牛肉、牛肚、牛筋，仲有半只卤蛋，牛肉好好，唔太韧又唔太腍，牛筋就唔得啦，腍到好似啫喱咁，个人喜欢有少少𡁻头嘅，牛肚就一般，见店内海报讲到汤底好似天下无敌咁，就喝了几口，好清甜，感觉真系无味精，正！总括来讲，都系值得推介嘅食店。