九龍餐室

营业中

休息中

圣诞日又出左黎深水埗度买野，攰攰地入左九龙餐室食晏，本来系因为佢门口嘅新鲜面包好吸引，谂住叫个菠萝油㗎，但后尾又转軚叫饭食。午餐时段刚坐落时仲有好多吉枱，食到中途全场爆要撘枱了，其实张枱都几窄，中间间开有啲迫，无咩事都系食快啲早啲走啦。叫左好耐都无伙计得闲落单，不如试下行qr code等客人自己落？可以节省人手㖞。饭餐有汤送，西汤话系粟米忌廉汤，但睇落同饮落都系粟米蛋花汤，名不乎实…中汤唔记得系咩汤了，记忆中偏咸少少外都ok嘅。餐饮叫左热柠水同茶走，杯柠水好苦，茶走就几好饮。朋友叫嘅梅菜扣肉饭，梅菜太少，扣肉太瘦太干，健康版嘅扣肉？哈哈，完全无肥膏位㖞。自己叫左午餐A系焗夏威夷牛扒肠仔饭，个汁酸酸甜甜几好味，饭炒底有诚意，肠仔系厨师肠，牛扒就焗㶶左好干好硬，败笔处…无期望就唔会有失望，一间正正常常嘅茶餐厅，唔难食亦唔会话好食，六十蚊个餐系食呢啲。