盛記盆菜&盛記麵家

营业中

休息中

呢间餐厅好有老板嘅个人风格，周围都挂咗好多充满特色嘅装饰。出边系屋村，但系餐厅就好似入咗去另一个世界，好钟意咁特别嘅餐厅。呢度好多食物都系自家制，充满特色，亦都好好食。服务更加系非常高质，店员服务细心，令我哋过咗一个好开心嘅晚上。晚市只有打边炉，我哋嗌左咸菜胡椒猪肚汤底，汤底非常足料，配料食极都唔完。好欣赏佢哋嘅象拔蚌刺身，非常鲜甜，切得厚薄适中。而餐厅独有嘅蚝仔饺亦都好有特色，自家制果然唔同啲，充满麻油香。呢两样嘢都系必食！另一样嘢一定要食嘅就系手切肥牛，店员话例牌会瘦啲，而大嘅手切肥牛会比较肥美，我哋就拣咗瘦啲嘅例牌。亦都非常好食，本地牛肉充满牛味，亦都切得厚薄适中！呢个自家制嘅响铃亦都不得了，非常之新鲜，好香脆，但系又无一般坊间买到响铃嘅油溢味！虽然好邪恶，但系吸收晒汤底嘅精华真系好好食。因为庆祝屋企人生日，我哋亦都嗌左寿包，店员仲好细心咁样准备咗好可爱嘅熊仔蜡烛，好有heart。除咗食物出色之外，呢度嘅服务亦都系世界级嘅一流，所有店员都好attentive，有咩需要都会即刻帮到你。佢哋嘅服务态度好好，成个氛围好开心。好想多谢佢哋，俾咗一个咁开心嘅晚上我同屋企人。