基隆茶餐廳 (已結業)

我觉得一间食肆只帮衬过一次就去评论，有时难免流于武断，因为每间食肆定必有强项弱项，食啱食唔啱，感觉可以差之毫厘，谬以千里。帮衬基隆茶餐厅嘅两次经历，就系其中一个最好嘅例子。第一次去，当时唔太肚饿，叫咗个虾多士拼薯条下午茶餐，虾多士唔系由细到大食惯一块面包上面铺住虾胶𠮶种，而系将啲虾仁放喺面包入面再成块炸，好似有馅嘅西多士咁，食落口感有啲怪：出面系香脆嘅面包，但入面系软腍嘅虾仁，两者落差比较大，至于薯条水准亦一般，炸得比较硬身。当时已经估计，呢间嘅西式食品应该唔系主菜。回家后睇食评，果然中式食物才最耍家，所以第二次去，二话不说就叫咗碟干炒牛河。一上枱，见到条条河粉色泽均匀，满布油光，已经蛮有信心，一啖入口，只觉河粉香，镬气够，牛肉亦软腍有肉味，认真唔错。值得一提既系，小店居然采用纸饮管，为环境出一分力，真系意想不到😮。深水埗新店位于超过七十年楼龄嘅恒贞大押旧址，成栋建筑物外观满有历史感，店内亦保留咗两边有圆拱嘅石墙，颇有欣赏价值。