燈籠滷味 T.P.E. (M88) (已結業)

灯笼卤味近呢几年都越嚟越开得多分店，仲要开系旺角大商场，其实我对新式潮州卤水的观感麻麻地，觉得食潮州卤水野，首选一定系传统打冷舖头。不过上星期约左朋友系中环，想揾间舒服啲的可以倾计，所以最后拣左位于威灵顿广场的灯笼卤味。首先装潢都算几特别，周围都有台湾元素的海报同灯牌。而当中有个2人餐都几抵食，包一款小食、一款前菜、芋圆冰同两杯台式饮品，而主菜有6款卤水食材配面，份量非常丰富，而价钱都系二百几蚊，以晚饭价钱黎讲都算几抵食。食物质素方面，小食起司麻糬应该系现成急冻货，但起码出黎够热辣辣。前菜葱抓蛋饼整得够实，唔会一夹起就散乱，食落去都够热，食材组合及味道都唔错。主菜卤水虽然用汤面形式上枱，所以汤汁唔会好浓味，不过金钱肚同猪耳都入味，同时保持质感。不过萝白、豆腐就唔够入味，而卤水汁都相对单调，味道层次唔够复杂。而最后饮品及甜品正常发挥。整体黎讲，呢个二人餐份量同味道，再加上中环呢个地方，绝对系唔错的选择！