Don X Sushi Generation (已結業)

今日嚟到呢一间系中环新开嘅日本菜，系主要食刺身丼同寿司。价钱以中环来讲唔算贵，而食物嘅质素比我想像中高好多，同店员倾落先知原来几位师傅有多年omakase嘅经验，所以对食物质素十分讲究。每个套餐都有味噌汤、沙律同前菜。北海道海鲜丼 $180性价比极高，真心觉得好抵食。除咗相入面嘅刺身外，其实下面仲有大量蟹肉同两大粒帆立贝。刺身新鲜，特别系海胆好鲜甜。但系最令我惊喜嘅系鲍鱼同帆立贝，煮得好入味，口感软滑，同平时食到好韧嘅帆立贝系两回事，值得一试。自选寿司($360)由于选取最新鲜嘅食材，所以每日供应嘅鱼都会唔同。当中有几种唔太清楚系咩鱼，店员都好细心咁帮我地翻译。当中最推介系fatty tuna,油脂丰富，食落满口甘香。另外其他质素都唔错，可以试到平时食少食到嘅鱼。最后仲有甜品，今次系芒果大福。依间店系新开嘅，不过已经储左唔少熟客，座位唔多，建议先订位。另外如果喺中环返工，仲可以叫外卖，佢哋话份量系一样嘅。新menu仲多咗熟食嘅选择，有飞驒和牛食。