文聚料理(分子) (已結業)

平时比较少食中菜，但讲到中菜最钟意嘅一定系呢间文聚，唔好俾佢异常罨耷嘅装修吓退，其实呢间嘢真系又平又好食😂 平时都系食客饭，今次难得五人成团终于可以叫佢啲小菜食✨菜色选择唔多得十零款，但胜在款款出色，最想试嘅煎虾丸过百蚊以该店计都几贵，但用料新鲜虾味浓郁，质感超软弹，上下煎香够惹味。而两款煲牛腩同镇江骨都系无可挑剔，同之前食嘅一样入味够腍，以小菜型式叫就会改用砂煲上碟，一路热住够哂热辣之外仲更加香口✨ 至于无敌水晶鸡鸡味依然香浓，系部分位置冇之前食咁嫩，始终成只鸡总会有部位唔同，唔太多人的话叫个例牌就够😌