Oldish (已結業)

星期六chill chill，又黎观塘工厦觅食，巧明大厦的升降机真系好旧式，不过有位伯伯帮手控制，顺利黎到oldish餐厅。一入去就感觉到佢的风格，好多木的家私，有啲旧有啲古典味，都几有心思。枱櫈都系木，睇就好有特色，坐就麻麻地舒服。但整体环境几有feel。最得意的系枱面上装糖的器皿系非常中式，都几大contrast，又中又西。食物都系西式，但有自助沙律吧，都几多野拣，有沙律菜、粟米、薯仔、面包糠，仲有cereal添，不过冇奶。酱汁有芝麻酱、千岛酱，小型沙律吧黎讲算几唔错。Lunch set仲包汤，系蘑菇汤，味道唔错，但卖相一般，用中国碗装住有啲奇怪，质感亦略嫌太杰，但好够菇味。主菜全日早餐！都好丰富，炒蛋、烟三文鱼、肠、菇、焗豆、面包都好食，面包好香，甜甜地，好松软但好细个。肠份量几大，但几juicy。可惜，烟肉好dry，薯饼亦唔太新鲜，整体只属一般。饮品加钱叫左cappuccino，好大杯，而且几好饮，咖啡味浓，咖啡同奶比例亦啱啱好，唔错！工厦餐厅黎讲，装修几有特色，好有风格，食物就average，不过不失，系同朋友聚脚的好地方，咁的价钱包汤、沙律吧、主菜又有野饮，算几抵食。