鐵牛台灣牛肉麵 (旺角中心第一座)

营业中

休息中

又嚟到我最讨厌嘅星期二，同先生放工百无聊赖，想随便喺旺角食个晚饭就返屋企休息，本来想食越栈，行过见到原来铁牛就喺旁边，一直未试过，翻一翻门外嘅餐牌，发现原来价钱都唔贵，一试无妨。餐厅地方好大，但座位都几多，所以枱同枱之间略嫌挤迫。食物选择多，除咗主食之外，仲有大量台湾小食同台式特饮，拣好食物之后，需要先到收银处俾钱，然后侍应会送上食物。我拣咗奋起湖照烧鸡腿排便当($62)，份量都几多几抵食，除咗有成块鸡脾扒之外，仲有一小碗肉操饭同三小碟，分别系酸瓜、菜甫卤水蛋同蒜蓉生菜，相当丰富。鸡脾扒份量足而且啖啖肉，酱油带少许甜味，加上香葱同白芝麻，味道唔错，可惜肉质有少许嚡口，而且唔系好入味🙁肉燥略嫌少咗啲，煮得虽然算系软稔，但又未至于入口即溶，而且味道偏咸，虽然话系由台湾人主理，但味道同台湾食到嘅有一定距离，有少少失望😟先生叫咗招牌红烧牛肉面($63)，份量唔算好大，但汤头浓郁，牛肉食落似系牛展，半肉半筋，肉质软稔，唔错👍🏻至于面质，有少少似拉面，一般般。总体来讲食物中规中矩，虽然唔算好地道，但以咁嘅价钱同地点嚟讲，算系几抵食。