舞心拉麵 (已結業)

铜锣湾区真系有好多拉面店。一兰开咗之后相信对附近嘅店舖会有一定嘅影响。星期日下昼，连豚王都唔洗点排队，位处对面嘅舞心就更加唔洗讲。呢度亦系主打猪骨汤拉面，分白（原味）、黑（浓味）、同赤（辣味）3种。每款拉面都可拣选叉烧同蛋嘅份量，价钱由$68-$93；最少有一块叉烧，到最多4块叉烧加1只溏心蛋。每碗另有少许葱，芝麻同笋，其他配料如木耳或紫菜要另嗌。继续支持辣，所以我order咗赤，由于menu冇写辣度，问问店员，佢话可选大、中、小辣。咁我拣大辣啦，面要普通硬度。汤，橙橙的，浓度一般，有点稠，但都够猪骨味。其实香港人唔算食得好浓，太杰太浓嘅浓底反而会好滞。汤面有好多油，相信大辣系靠加较多嘅日式辣油。起初觉得唔错，但食食吓有点咸。面较幼，＂普通硬度＂，但觉得都系淋咗少少。虽然面条可索多啲汤，但唔系好有口感。叉烧肥瘦均匀，烧得好香。溏心蛋一般，质地软身同带点咸。枱面有几款调味，所以亦试一试。拉面胡椒好香，辣油只系普通港式辣油。呢度以木为主调，设计简约。枱唔太逼，坐得舒服。整体嚟讲拉面中规中矩，价钱合理，都可考虑再帮衬。