亞越泰 (已結業)

去到石门其实餐厅都算多选择，晚饭时间谂住去新陈根记怀缅一番，点知出面已经排左超过三十人，我地一行四人见都唔系好肚饿就过左隔离哩间唔知系越南定泰国野坐底叫少少医肚算。餐厅晚饭时间都算多人，我地被安排坐于卡位都算坐得舒服。小食蒜蓉包，搽左少量蒜油，份量四小件。貌似餐汤送嘅法包多过我俾钱散叫既小食。香茅鸡翼，份量算大，有大约八大只，都够热够香脆。香茅猪扒饭，煎蛋应该一早已经预备好夹落去，猪扒干而不香口，唯有配上大量香葱蒜提升味觉同口感。饭系热既。蒜蓉炒芥兰，卖相色泽ok, 亦够热同够镬气，唯份量超少，我谂得十条八条菜。咖喱牛腩农夫包(小)，哩个竟然ok, 牛腩淰滑送你几旧根，咖哩唔辣但都算几香。细size一齐分享都够食。总结晚餐黎讲环境系有啲颓，似返工返学食lunch咁。其实哩种定位唔知系泰定越餐厅通常会中伏，不过佢又唔系难食的。只要记住佢系茶餐厅价钱，亦提供到茶餐厅质素，童叟无欺唔会有惊喜。