潮庭 (新城市廣場) (已結業)

一家人最钟意围住一齐食饭，今晚就拣咗呢间潮庭叫𩠌食饭，环境唔错，安排咗去角落，可以静静地俾大家倾吓计，而且同隔篱枱都隔住屏风，安排得几好。菜式叫咗四囍拼盆，蚝饼，炸子鸡，卤水鹅片，小云吞浸娃娃菜，梅花扣肉同埋杏汁猪肺汤。四囍拼盆比较吸引，可以自由选择小菜款式，都系以海鲜类为主，例如带子、桂花蚌、花枝卷同蟹肉卷，味道清淡，但都够晒味，口感唔错够晒弹牙。蚝饼都够晒特别，一上枱就见到有好多蚝仔，但佢嘅做法比较特别，唔同普通嘅潮州炸蚝饼，类似台湾蚵仔煎，饼底系应该系加左地瓜粉，有啲qq口感，但系味道都偏清淡。同埋佢个杏汁猪肺汤，真系饮到用杏仁榨汁嘅质感，成个汤奶白色又好香杏仁味，啲猪肺都洗得干净。最后用中银卡消费，仲有$300现金券回赠，计埋都几抵食。