燒鳥亭 (已結業)

星期六，約朋友到天后搵串燒食，行咗幾家串燒餐廳，都係依間比較吸引我，門口好有日本舊式居酒屋Feel。晚飯時間店內都比較多人。前菜有蟹膏蟹肉沙律蟹膏蟹肉沙律：蟹膏好香好濃口，加上蟹肉同西生菜一齊食又香又爽口。串燒首先先叫咗兩件羊扒，外面燒得香脆，咬落去好多肉汁，口感味度一流。厚切牛舌，雖然厚但一啲都唔硬，彈牙軟熟好有咬口，加上又肉汁濃口。淮山就第一次食到，一直以為淮山只係用嚟煲湯，估唔到用嚟做串燒係咁好食，淮山口感滑又脆，又加上少量黑椒帶出些少辣味，好特別。秋葵豚肉卷，之前係其他串燒店未食過，梗係Order埋佢。外面豬肉燒得好香口，豬肉緊緊包住秋葵，肉汁令秋葵唔會燒到乾身，保持秋葵獨特滑溜口味。翠肉瓜，炒就食得多，做串燒意想不到汁液豐富，一啲都唔乾身。帶子雞翼，手工製作，將雞翼去骨，再將帶子釀入去，一口咬入去首先食到雞翼嘅香脆，然後充滿雞汁同鮮味嘅帶子再令味道更加提升。日本黑豚肉，洋葱帶一點香，肉質鮮嫩入口即溶，好啱送白飯一齊食。食串燒就一定要送啲酒類，Sapporo生啤易入口，麥味唔太濃，唔怕會影响到食物味道。人均消費300蚊左右。