渡船角海鹽燒 (已結業)

呢晚突然好想食串烧，于是就揾吓附近有无啦，咁啱又俾我见到有间串烧店，于是我就决定去试试。睇到门口个牌写住招牌广岛蚝汤，又见到隔离饮紧㖞，我谂一定系必叫嘅，所以叫咗个试吓，个汤嚟到热辣辣，汤里面有只肥美嘅广岛蚝，果然系招牌，好鲜美。盐葱烧茄子烧火候刚刚好，唔会烧到好㶶，仲好细心咁切开一件件，方便食用。宫古豚肉烧完仲有好多肉汁，鸡肾就好爽脆。冲绳Agu豚肉荔枝卷食到油香，加上荔枝嘅酸甜，中和咁豚肉嘅肥腻感，好味! 烧韮菜都好香，但又唔会太干。烧蚝可选双并，我拣咗盐烧同蒜蓉两款口味，盐烧食到厚岸蚝本身嘅鲜味，蒜蓉口味就比较惹味，带出蚝味，正! 烧菠萝一向都系我最爱，所以去亲食烧烤，都会叫。香汁烧白鳝外皮香脆，肉质系爽爽哋𠮶种，唔错!食食吓愈嚟愈多人，好彩早一步过嚟食晚饭，避开人潮。