海外天大馬美食 (已結業)

原本想同朋友去越华会食饭，谁知行经对面，见到有间餐厅贴住张肉骨茶嘅相，我哋两个都真系好耐冇食过肉骨茶，于是就入去试试。当时餐厅入面一个顾客都冇，一般情况我大多会松人，不过我哋戚起咗条筋，真系好想食个肉骨茶，于是抱住少少怀疑嘅心态，坐低叫嘢食。餐厅有晚餐menu，平均七十几蚊包埋饮品，我哋叫咗一份肉骨茶晚餐跟冻拉茶，另加一条姜蓉蒸鲩鱼，同埋一客虎虾。肉骨茶嘅猪排都几大旧，仲有软骨，配黑豉油好正；虎虾有咸蛋皇味，但未至于黄金虾咁浓烈；鲩鱼好滑味道都唔错，只系个人口味觉得咸咗少少！基本上行入一间冇顾客嘅餐厅，本身冇乜期望，谁知又真系有啲惊喜！食到尾声陆续有顾客入嚟，可能愈夜愈有人气吧？！