燒肉臻 (已結業)

听朋友介绍，呢间餐厅有得任饮清酒，曾经流行过嘅任饮终于有机会可以回味返，不过以前饮酒就系玩，但而家饮酒真系想同朋友倾吓偈，衬好朋友生日一于饮多几杯。我哋首先点左啲小食开下胃先，薯仔沙律，同埋烧明太子，烧明太子辣辣地宁舍开胃。见到甲罗烧一定要叫来食下，可以自己烧更加可以符合自己口味，因为我钟意烧得比较耐啲，出边有啲会烧得冇咁香，而家我钟意点食都可以，真系好钟意食蟹羔，普通配块饼已经非常好食。之后，点咗只圣子都好大只好鲜甜，仲点左几款唔同嘅肉，例如鸡肉，猪腩片，鸡心，同埋牛舌等，全部都好有水准。可以自己烧，有得玩有得食，过程都几得意，最精彩一定系和牛，普通烧两下，已经可以夹起，好浓郁嘅牛肉香味，而且入口即溶嘅感觉真系好满足，一次过食到三款唔同嘅和牛，真系好幸福。虽然任饮只系90分钟，以我哋而家嘅酒量其实都非常足够，我同寿星女都过咗一个好开心嘅晚上。