青咖喱屋

营业中

休息中

以前响黄竹坑𠮶头做嘢，食晏都几麻烦，虽然话工厂大厦入边有好多嘢食，但试过几次非常伏之后，唔系带饭，就要去香港仔食。不过每星期最少食一次嘅就系响黄竹坑熟食巿场入边「咖喱屋」嘞！今次难得有机会又入去黄竹坑，就带埋啲同事去熟食巿场食。之前入边有起码三间食泰国菜嘅餐厅，今次去好似有间执左，而「咖喱屋」系我认为 (食泰式粉计) 胜价比最高嘅一间。而且我系唔厌闷地每次都系叫冬阴功汤底金边粉鸡肉札肉嘅。今次当然唔例外，冬阴功汤底酸辣平均，虽然好偶尔系会觉得辣得滞，但平均黎讲系唔会太辣，所以次次都系饮汤饮到见底。金边粉同其他配料系普通啦，有同事话香茅鸡扒同海南鸡饭都好食㖞。一个粉加杯跟餐冻饮都系$40，实在系好化算。不过夏天去系会热啲(系无冷气嘅!!!) ，老老实实就唔好谂住系去一般餐厅咁食嘅心态。同埋一点半之前都系超级多人嘅。所以唔就啱时间去就实要等位。