玖捌 (已結業)

上次嚟九龙城食饭已经留意到玖捌呢间特色饮品店，呢日同同事收工落九龙城买嘢谂住顺便入去买杯野饮，先发现原来里面仲有咸食同甜食提供！见有bagel又有甜品，卖相精美好吸引，我地索性喺度坐低食埋野先走。☀️百子奶茶(左)同一般奶茶唔同，百子奶茶原来用咗椰子奶，唔怪得入口有阵阵嘅椰子清香，质感非常顺滑，甜度适中，同时茶底够浓，茶香十足，而且冇苦涩味。椰子奶同茶底比例完美，两者味道平衡得出色。☀️玄米茶杏霜(右)同事嘅玄米茶杏霜，我都试咗啖，自问本身唔系特别喜欢杏霜嘅味道，但都觉得呢个杏霜味道好清新，味道天然，同时又有玄米茶嘅香气，甜而不腻，几有惊喜！☀️十谷贝果+黑松露点点酱店员好细心，问我地个bagel钟意食脆啲定唔洗咁脆，我哋两个都拣咗要脆身。Bagel果然烘得香脆，内里保持烟韧，食落仲有阵阵嘅天然谷味。不得不提系店家自制嘅黑松露点点酱，一打开个酱盒，黑松露香味已经四散，非常足料，质感香浓软滑，同bagel简直系绝配！☀️Poppy Seed Bagel+龙虾点点酱外表香脆，poppy seed食落亦系脆卜卜，内里绵密，有阵淡淡嘅甜味。自家制嘅龙虾点点酱同样出色，十分鲜味！同埋真系食到龙虾嘅味道！