雲壽司 (已結業)

之前喺中环食过一次云寿司，性价比好高，价钱虽然唔贵，但刺身由日本空运直送到港，质素新鲜！所以当知道九龙区开咗分店后，老公就嚷著要我同佢再去食！北海丼($188)刺身铺满整个碗，一个丼有齐吞拿鱼腩、油甘鱼、赤贝、牡丹虾、海胆、三文鱼及三文鱼子，非常丰富！每块刺身都好厚切，口感饱满。吞拿鱼腩油脂密布，有入口即溶嘅感觉！油甘鱼肉质细嫩，鱼味香浓！赤贝都好新鲜，口感爽弹！海胆色泽同卖相都好好，无岀水情况，入口鲜甜唔腥！特上寿司拼盘($250)拼盘有吞拿鱼腩、深海池鱼、牡丹虾、赤贝、海胆、三文鱼子、火炙左口鱼边、鲭鱼、鲂𫚒鱼、葱吞拿鱼腩寿司10件寿司，每件都系师傅即点即握。寿司握得唔错，唔会握得太实或松散。呢个寿司拼盘嘅款式比北海丼嘅多几款，比较特别嘅系有鲂𫚒鱼。印象中喺omakase食过，估唔到呢晚都有得食！鲂𫚒鱼油份唔多，但肉质鲜甜爽口！深海池鱼油份则非常丰腴，口感肥美！左口鱼边油脂甘香，饭粒吸收鱼油后唔单止更加香口，亦减低腻感。