去滾

营业中

休息中

终于等到零感染，即刻忍唔到口冲出黎食野。餐厅入面灯光较暗，有好多霓虹灯字句，感觉似夜晚系旺角咁，非常港式风格，连菜单都相当有特色。餐厅都几大，正正方方，有几间房可以自己一班人，而出面仲有个露台烧烤区。餐厅环境同食物都好好，疫情人真系人数极少，今次得两个人食，平均每人$450。原个椰子鸡汤（半只）$268真系成个椰子水连埋肉系你面前倒哂落去个锅到，即刻成个锅变到好清甜，每一啖都食到淡淡的椰子香味。鸡肉份量都算多，味道唔错。至尊天九牛腩头 $378一碟大约有１６块左右，中等厚度，都算大块，牛肉味愈咬愈出，脂肪唔多相对比较有咬口。百花齐放蔬菜拼盘 $88有８款可选３款菜，我地拣左西洋菜、油麦菜同皇帝菜，好绿好新鲜。丸子饺子拼盘 $88都系可以拣３款，牛肉饺、手打虾丸同墨鱼丸，牛肉饺馅料都几多，虾丸真系见到好多虾好爽口，真材实料，而墨鱼丸就比虾丸弹牙好多，估唔到质素咁好。唔系椰菜花椰香脆麻花 $48自己一向都好钟意食脆麻花，呢个真心觉得好好味，有６旧，热辣辣出炉，好脆卜卜，配埋溶溶地蜜糖，又香又甜，重点唔痴牙又唔太甜。