Pepper Lunch (黃埔天地美食坊)

营业中

休息中

响黄埔附近做完嘢又全日未食嘢，所以想揾个简单快啲唔使等嘅地方食晚饭，之前经过见到呢间pepper lunch都有啲人响度排队，所以一路都冇试过，今次可能夜咗少少，所以我一个人唔使排队即刻入到去，终于可以食吓呢一间嘞。另外一个重点就系佢好近黄埔地铁站，食完就算落雨都系跑过一条马路就已经搞掂，或者直接响下便巴士总站搭车走都得，所以位置方便真系几好。今次可能真系因为肚饿，所以重手叫咗一份牛肉拼芝士酱饭，再加鸡蛋再加芝士，仲要加多个季节汤，同埋凉拌芝麻酱西兰花，最后加多一杯Pepsi添。双重芝士夹击之下真系好香，加埋只蛋实在冇得输，不过仲有一份芝士酱俾我，再落埋落去就好似比较湿咗啲，所以我等啲响个铁板度煎㶶少少先加落去。个餐汤冇乜特别，个人觉得一定要饮咗先至好食饭，如果唔系个汤会冇乜味。西兰花就真系滚水渌西兰花，如果冇芝麻酱就一啲味都冇同埋比较淋。整体嚟讲都维持到水准嘅，系今次自己冲动叫多咗少少嘢，下次跟返正常份量应该冇问题。