滿屋廚房 (已結業)

好耐冇嚟过愉景新城啦，最近去咗亲子餐厅Fullhouse Kitchen食晚饭，强烈推荐。除咗环境适合带小朋友嚟之外，我觉得都好啱三五知己嚟食饭，因为好抵食，样样都系几十蚊兼大大份！点咗小食沙嗲鸡串(6串），鸡肉烧得刚刚好，完全唔干，沙嗲酱仲有少少花生碎嘅口感，好惹味！开头以为呢间系西餐厅，点知都好多东南亚菜式，见到连喇沙同海南鸡饭都有得食。点咗海南鸡饭，虽然鸡肉份量唔多，但胜在肉质嫩滑，完全唔嚡，而且唔会太咸或者太油腻。鸡皮薄薄一片，咬落微微带爽脆。酱料有齐三款，黑豉油、辣椒酱同姜蓉。辣椒酱酸辣醒胃，蘸少少更加吊味。唯一需要改善嘅地方系鸡饭无咩鸡油，我嫌太过健康呢。见到蛋糕柜嘅西饼好精美，我哋就点咗一件柚子蜂蜜卷蛋试下，估唔到好好好好食！！！！呢款系季节限定，蛋糕好松软，食落有清爽滋润嘅柚子蜂蜜嘅香甜味，味道好清新。入面嘅cream亦好轻盈，好有水准，$22我觉得都抵食呀。