心裡有素 (已結業)

圣诞节食多咗嘢好自然想食翻啲素食或者清啲去平衡下，行开油麻地记得同事推介过一间会定期派发爱心饭盒嘅良心素食餐厅 — 心里有素，六月到而家已经派咗六千几个饭盒！餐厅平时都好高人气，我哋今次过嚟大概六点已经有人排队。先比钱买飞再入座，晚餐时段成人$128一位，座位比较紧密，靠水吧嘅自助食品区都算大同多选择！厨房出菜位旁边系沙律水果吧，有多款蔬菜比客人mix，我就超钟意有熟度啱啱好嘅牛油果同大粒又多汁嘅蕃茄，清爽健康！前菜有凉拌粉皮、青瓜、木耳、糖渍蕃茄等，有一款凉拌面特别用咗辣酱汁，刺激惹味！炸物选择好多，除咗有炸茄子同南瓜，仲有盐酥菇同秋葵等等，定期会炸起一轮，香脆可口，如果觉得唔够浓味，可以自己再加岩盐同胡椒！主食有粥、饭同各款炒粉炒面，另外仲会不定时推出限量食品，例如今日就有时令芋头煲仔饭、咕噜合桃同酸甜淮山，其中芋头煲仔饭热辣辣又香软，咕噜合桃入味微酸，口感香脆可口！饮品有多款茶饮，个人尤其推荐十五年陈皮姜茶，微辣姜味饮落几开胃又养生！