十二味 (如心廣場二期)

营业中

休息中

刚开张嘅时候已经想食，奈何超旺场要等成十几张枱，所以被迫放弃。今次专登早啲攞位，但都难逃等待嘅命运，等咗足足半粒钟终于可以入座。食物种类简单，主要以酸菜鱼同香辣炒锅做主打，配上些少川味小菜，大部份以香辣为主，最贴心嘅地方系有儿童餐提供，即使成家大细嚟食，都唔怕冇嘢啱小朋友食。酸菜鱼只有辣同唔辣可以选择，嗜辣嘅我当然拣辣，份量算多，一盆已经差唔多霸占晒成张二人枱。鱼切得够薄，但又唔会一夹就散，配上又酸又香又辣嘅汤底，更显得鱼片又鲜又滑。任何香辣嘅汤底都离唔开薯粉，佢嘅粉条质感似薯粉，呈透明状，入口比薯粉软滑些少，配搭鲜香浓郁嘅汤底，绝对系绝配！除咗酸菜鱼之外，当然要品尝一下佢嘅香辣锅，我哋拣咗非常邪恶嘅干煸肥肠，猪大肠皮炸得非常酥脆，内里依然保持口感，咬落去油香四溢，虽然配上大量红青辣椒，但香口得嚟唔会太辣，加上白芝麻非常香口。本来想嗌欲望酸梅，可惜已经售罄，所以拣咗荔枝玉露，冰冻解辣，亦比我一个藉口下次再嚟。