世澄日本料理 (億利工業中心) (已結業)

食评唔多，图像左上角又有绿条，以为新店，一问之下，已开业踏入四年，只系老板易手，厨、侍不变。此餐牌是日刚好新鲜出炉，每套餐追加一项，呢部分算几抵。先嚟嘅「 极上牛肉黑蒜油乌冬」，饮啖汤底，好咸，但黑蒜油嘅黑油偏少，出现较少喺汤面类现身嘅温泉蛋（汤面似乎用番溏心蛋合适，温泉蛋一𢳂即散遇汤即化较合捞丼饭），有大量嘅粟米粒同海苔。食唔到牛肉质量系咪所谓极上，因太咸都掩盖咗。「特上海胆当」名就咁叫，但海胆真系冇乜担当，仅得一小截舌头嘅大细咁多。而且整碗丼个size 系儿童份量𠮶种，一望已知唔能够填肚，定必要追加。掩不住好奇临尾追加个「海胆天妇罗」，似系用紫菜包住蛋浆皮内藏少许海胆肉去炸，两份切开四件，得四条拇指粗、中指长嘅炸海胆，剩番一条绿色物体系炸幼辣椒，总体算好食但要催眠自己系食紧有海胆嘅嘢，实在含量太少，收$108略嫌咋舌。补充番，晚市系冇单上面写嘅前菜面豉汤沙律附送。