新蒸武門 (已結業)

唔知由几时开始，食「住家饭」对我呢啲穷忙香港人黎讲，好似慢慢变成左一件奢侈既事……出街食住家菜，听落有点讽刺，但何尝都系想收工可以食餐安乐茶饭而已。骤眼睇见餐厅名「新蒸武门」，仲以为食既都系蒸煮为主既功夫菜式。原来午市先系食健康蒸饭为主，晚市主打一系列健康无味精既住家菜。未点菜，店员先为我地泡了八宝茶 (有甘草，菊花，雏菊，红枣、杞子等)，据讲有去腻消滞功效呢。既然如此，一于先叫半只「招牌宫廷香辣鸡」(由于我地本身都唔系好辣之人，所以同左店员讲叫少辣)。香辣鸡炆得都够入味，经过走油，本身已相当香口，只系鸡肉稍嫌有啲干。重点系加埋爆香左既葱蒜炒埋一碟，最啱用黎𩠌饭食！半只鸡份量其实不少，绝对够我地两个人食。另一道家常「蒸选」系「土鱿蒸肉饼」。呢度蒸肉饼都系即叫即蒸，唔似出面有啲预先蒸完摊系度，所以食起黎一啲都唔觉得干。只系略嫌有点油，如果再少油啲我个人觉得更住家菜feel。呢个时候饮番杯八宝茶就再适合不过。食完较重味既家常菜，最后都叫番碟「翠玉瓜云耳炒百合」。味道虽然平平无奇，但咁先可以番百合云耳本身既原味，亦令人记挂住家菜味道……今夜难得同好友食餐安乐饭，享受相聚时光，满足矣。