翔壽司

营业中

休息中

自从恢复晚市之后，大家都努力还返啲生日饭债，友人就提议去厚福街揾食，贪呢度多选择。嚟到大家都表示唔系太肚饿，于是就选择咗翔寿司食吓寿司刺身。小店规模不大，店内就只有围住寿司师傅工作枱嘅曲尺形吧枱，大概只有十数个座位，感觉犹如置身喺日本筑地嘅寿司小店内。我哋选择咗精选刺身(二人前)，包括有三文鱼、带子、池鱼、甜虾、油甘鱼各两件，每款都新鲜甘甜。另外拣咗特上寿司盛合，总共有十款不同寿司🍣。海胆鲜甜醇厚，有入口即溶嘅感觉。三文鱼籽粒粒晶莹饱满，咬落鲜味。牡丹虾肉质厚实肥美甘甜。带子味道鲜甜，肉质柔软。炙烧金线鲷肉质经火炙后更加嫩滑有口感。拖罗虽不算十分肥美，但亦带咸香。深海池鱼肉质较爽口，试一口足以令人回味。同样系池鱼，上面加咗姜蓉及葱花，香而不辣。特别要赞赏嘅就系呢度嘅服务，员工会首先问客人食唔食Wasabi，我同朋友各有喜好，于是寿司师傅就冇将Wasabi放入寿司内，而系将之放喺碟嘅旁边，真系非常贴心嘅服务。