影片
更多
2021-07-12
5512 浏览
有时食腻左、或者个口生痱滋，总会有时想食清一啲，自然会谂起食素，所以呢排钟意食素既人有增无减，尤其系上班一族，贪健康又易消化。平时食斋嘅人、或者唔太食开斋嘅人，最怕就系见到啲好闷嘅菜式，一系就好惊菜式会重又重油，为咗令到味道丰富啲，或者会有好多炸物，所以食斋都唔一定系健康啲，食完都唔一定会瘦。不过依一间湾仔嘅素食私房菜，唔单止菜式够创新，嘢食好食唔油，而且价钱合理，啱晒一班人嚟食。中环、湾仔一带，如果想揾会做晚市嘅素食店，实在唔多，但湾仔就隐藏咗一间高质嘅素食私房菜。呢间餐厅唔系一间打卡餐厅，所以网上嘅讨论程度唔高，系一间低调食素既小店。呢间丽姐厨房，由从事素食行业超过二十年既丽姐一家打理，丽姐由一间唔显眼既小店做起，到后来成为素食店顾问总厨，再自立门户开设呢间丽姐厨房，靠呢份努力同坚持，做出与众不同既素菜。餐厅午市主打抵食的$50三𩠌饭，配无限任添糙米饭同例汤套餐，晚市主打特色素菜小菜。食斋最怕就系油淋淋同好多味精，但呢度食绝对可以放心，因为老板娘丽姐嘅宗旨系佢自己都食先可以比到人哋食，所以素菜主要系用盐、冰糖同埋纯天然菇粉去做调味，系挑选食材方面都严格，首选本地种植嘅蔬菜，保证低碳
中环、湾仔一带，如果想揾会做晚市嘅素食店，实在唔多，但湾仔就隐藏咗一间高质嘅素食私房菜。呢间餐厅唔系一间打卡餐厅，所以网上嘅讨论程度唔高，系一间低调食素既小店。呢间丽姐厨房，由从事素食行业超过二十年既丽姐一家打理，丽姐由一间唔显眼既小店做起，到后来成为素食店顾问总厨，再自立门户开设呢间丽姐厨房，靠呢份努力同坚持，做出与众不同既素菜。餐厅午市主打抵食的$50三𩠌饭，配无限任添糙米饭同例汤套餐，晚市主打特色素菜小菜。食斋最怕就系油淋淋同好多味精，但呢度食绝对可以放心，因为老板娘丽姐嘅宗旨系佢自己都食先可以比到人哋食，所以素菜主要系用盐、冰糖同埋纯天然菇粉去做调味，系挑选食材方面都严格，首选本地种植嘅蔬菜，保证低碳同高质。
丽姐厨房喺湾仔开业近十年，系前年面对年月亏损，本身丽姐想结业，对店舖将来唔再有希望，但佢又同时唔舍得，一来已经付出左10几年心血，二来担心入边嘅员工会面临失业，唔舍得呢一班同事，经过一班同行者支持之后，生意近日有好转，令佢继续坚持落去。
我虽然系湾仔读左九年书，但完全唔知道呢一间餐厅，我会知呢一间餐厅，系因为梁祖尧曾经买过呢一间嘅糕点，喺节目上同主持一齐食，佢当然系好推介，主持食过之后都赞非常足料，个集之后询问度极高，梁祖尧最尾喺社交平台公开呢一间餐厅，免费宣传叫大家大力支持呢一间小店，我不嬲都系梁祖尧嘅拥趸，觉得佢煮嘢食好叻之余都好识食，唔好食嘅餐厅佢唔会推介。原来梁祖尧由旧舖开始已经帮衬，帮衬左10几年，第一次帮衬，即使食咗三碗饭都觉得唔够，丽姐话唔使担心会装饭俾佢，至此佢就成日嚟呢度帮衬，每次丽姐有新菜式都会俾佢试，所有嘢食都系丽姐佢自己煮，日日都可以见到丽姐系铺冇放过假，当佢知道丽姐因为蚀钱蚀超过百万，就号召大家一齐帮衬，因为佢觉得嘢食好食，带过去食过既朋友都冇失望，当中佢觉得最好食系素鸡髀、咕噜肉、素叉烧、流沙饺等等。除咗大赞嘢食好食、够平、白饭任装之外，仲大赞老板娘非常好客，所以我未食之前都好有信心，学佢一齐做有心人。
因为一直想约一班人食饭，最适合既应该系叫𩠌食饭，比左几间选择大家，第一间中菜打电话过去点知FULL，所以就选择左呢间，但事后发觉大家原来唔知呢间系素食，因为相中系咕噜肉，大家真系以为系真咕噜肉、真既叫𩠌食饭。
丽姐厨房系谭臣道，系一条平时唔会经过既小街，就连我系湾仔返左9年学都好小行，因为个度餐厅唔多，但其实离湾仔地铁站好近，地铁站行过去丽姐厨房大概系3分钟，可能佢系私房菜，系一个商业大厦既二楼，唔枱头望上去根本唔会留意度，楼下无明显既大招牌，真系非常低调。搭LIFT或者行楼梯，上到二楼，一出电梯大堂就见到。
当日去餐厅系星期日，BOOK左夜晚7点半，去到餐厅发觉铺面几大，座位数量几多，但其实坐唔够一半人，晚市都坐唔满既情况，难怪之前报导话蚀成百万。不过丽姐厨房嘅晏昼系人山人海，因为佢哋午市饭餐实在太平太吸引。
可能因为人唔多，枱距离够阔，环境清静，基本上听唔到其他枱食客讲紧D咩。摆设装修上都有心机，有一个好特别既钟，窗边会有好多唔同种类既盆栽，除左令人心旷神怡，仲别具禅味。好适合同朋友坐低慢慢食饭，正常倾偈声亮都唔会影响到人，不过环境再好都要睇食物质数。
周围又贴咗好多字句，见到系黎自佛教慈济基金会香港分会既某法师提字，好似「家庭的幸福从孝开始」，睇完觉得个人格外平静。
午市同晚市嘅食法会唔同，午市系冇人带你坐边度，系自己揾位坐，入到去就喺柜台点餐俾钱先，之后会有号码，攞住张单去排队，左边系排堂食，右边就系排外卖，买完之后去厨房出餐嘅地方交张纸仔攞𩠌，再揾位坐。
打开Menu，图文并茂，餐牌定系菜色既名字，好似店铺装潢一样，传统同平凡，第一页系呢度茗茶同饮品，之后野食分为冷盘、汤羹、饺子、小食、焗类、蒸炖、煎炸、煲类、小菜、饭面类同甜品，虽然系素食，但食物种类非常之多，另外菜色可以选择加唔加蛋，啱晒唔同人嘅口味，呢本Menu主要系晚市单点，价格适中。午市方面价钱会更加亲民，每日周一至周五午市会有六选三𩠌嘅饭，$50就有交易，日日都唔同𩠌，小菜唔会份量小，非常适合唔想食太贵，但又想食得饱嘅打工仔，除咗三送饭仲会送埋例汤，例汤系足料老火汤，如果食量唔系好惊人一定会食得饱，抵食好食又健康，而且老板娘话过白饭同汤系任添，另外仲有水饮，感觉就好似喺屋企食饭咁。
-
茗茶 💰 12/位（👅: 7.5/10）
由餐牌嘅第一页已经见到佢哋有好多唔同嘅茗茶，系出面都见到佢地有卖茶叶，除咗有常见嘅普洱、香片、寿眉、水仙、菊花、铁观音，仲有少见嘅南非国宝茶，黎食素食就唔会想饮汽水，所以叫左水仙，饮落茶味甘香，唔会有好重苦涩味，浸左几次水，茶味都依然不减。
-
🥗 前菜 💰15*2（👅: 7/10）
前菜
$30
31 浏览
1 赞好
0 留言
前菜系云耳青瓜，份量正常，食落比较清淡，嫌口感唔够清爽、味道唔够重，不过作为开胃算可以。
-
1️⃣ 烧汁脆鳝 💰88（👅: 8.5/10）
烧汁脆鳝
$88
79 浏览
1 赞好
0 留言
外观上睇落去真系好似炸鳝，实际佢系沾上蛋浆嘅炸冬菇，咬落质感好似，咬落系比较硬身同埋外层脆，但味道当然唔会似鳝，不过食落同想像中有啲唔同 ，唔系想像中会有啲紫菜包住咁，虽然系炸冬菇不过食落唔会好油。烧汁食落会偏重味啲，食落系酸酸地所以非常开胃，如果捞饭系啱啱好。
-
2️⃣ 糖醋咕噜 💰88（👅: 9/10）
糖醋咕噜
$88
104 浏览
2 赞好
0 留言
呢度嘅咕噜肉有分糖醋咕噜同埋黑醋咕噜，见网上评价，前者评价比较好，再加上黑醋咕噜味道上可能同烧汁脆鳝好相似，所以就嗌左糖醋咕噜。
咕噜肉喺平时嘅打冷，当然系好常见几多道菜式，但系素食餐厅见到就会系好新奇。上枱时外观上，真系同平时嘅咕噜肉完全冇分别，一食落去就知，咕噜肉其实系猴头菇黎，但佢口咁真系做到好似，因为旧菇可以做到有一丝丝嘅口感，食落去系爽软滑溜，所以有啲似食紧半肥瘦猪肉，外层炸到香脆，炸衣够薄，食落完全唔油，每一旧咕噜肉都可以挂到好多酱汁，原来猴头菇可以做到咁好食，比起平时攞嚟煲汤实在好食得多。
而酱汁调味方面做得非常之好，虽然佢质地系偏稀，但食落够味，酸甜嘅味道攞到平衡，非常之开胃，捞饭食黎讲好适合。而伴碟嘅菠萝都唔系罐头菠萝，有诚意，食落同样系够开胃。
见到枱枱食客都有叫到呢个咕噜肉，就知呢一个系招牌菜式，我食完嘅感觉，都系觉得系必点菜式。
-
3️⃣ 蜜汁叉烧 💰88（👅: 8/10）
蜜汁叉烧
$88
77 浏览
1 赞好
0 留言
呢个蜜汁叉烧当然都唔系真叉烧，外观上比起真叉烧系比较暗淡既红色，食落就知其实系面筋黎，面筋可以模仿到肉拉扯既感觉，入面质地偏腍，味道上食落其实唔似叉烧，不过外皮有炸过，加上蜜汁同边位既焦，口咬系焦脆，口感上好似平时外层烧焦既叉烧咁。
叉烧食落好香口，甜甜地，略嫌蜜汁唔够多，唔似平时叉烧咁入味，不过送饭一流。
-
4️⃣ 黑松露牛油果炒饭 💰128（👅: 8/10）
黑松露牛油果炒饭
$128
82 浏览
1 赞好
0 留言
上枱时饭嘅香味扑鼻，饭炒得够干身，食落粒粒分明，好爽口，唔会话炒到好㶶，但会有小小镬气。
配料有红萝卜、鸡蛋、肉瓜、黑松露酱、牛油果，配搭唔错。牛油果食落几清新，味道唔算好重，同炒饭几夹，第一次见佢攞嚟炒饭，黑松露味虽然唔重，但配搭其他配菜，有令到个饭提升到层次，系素菜加黑松露绝对系增强味道既好选择，令到每一粒饭粒都充满香味，个饭整体够味。
如果要叫一碟饱肚嘅嘢食，咁呢个系好适合，质素都唔错。
-
5️⃣ 香煎莲藕饼 💰78（👅: 8.5/10）
香煎莲藕饼
$78
102 浏览
1 赞好
0 留言
莲藕饼够胀卜卜，咬落去外脆内软，食到有冬菇、萝卜同埋粒粒莲藕，食完觉得完全唔够喉，不过如果入边嘅配料再丰富啲更好，会食到入边嘅面粉或者面筋都唔少。
-
6️⃣ 台沟炒米 💰78（👅: 8/10）
台沟炒米
$78
75 浏览
1 赞好
0 留言
呢个炒米粉入面会有素叉烧、素餐肉、银牙、冬菇、椰菜、蛋，上面仲会有浸到芝麻。米粉系幼米粉，炒得够干爽，食落好香口，唔会话太咸，叉烧同火腿都好似真嘅肉咁，口感丰富，成碟食落唔油腻。
-
7️⃣ 双并饺 💰68/8（👅: 8.5/10）
双并饺
$68
75 浏览
1 赞好
0 留言
双并饺分别系梅菜饺同流沙饺，饺子大细几大只，数量唔少有八只，每只口味有四只，饺皮烟韧，皮唔算好厚，系皮薄馅靓，从外观上好明显分到呢两种饺，因为一个系深色一个系红黄色。
流沙饺入面其实系系蕃茄蛋，食落甜甜地带少少酸味，入边好似蕃茄炒蛋咁，系做到流心嘅效果，好似饮紧好浓嘅汤汁咁，但又唔会爆出来，除咗有薯仔，仲会有少少姜味，所以系非常开胃，钟意食蕃茄蛋嘅我完全抗拒唔到。
而梅菜饺既梅菜高质够新鲜，梅菜切到大大粒，咬落系爽口，食落系完全唔会过咸，因为已经经过多番浸泡，袪盐既功夫做得好好，味道会比较清淡，无过多既咸味，但保留左梅菜独有嘅香味，而且加入咗冬菇丝，虽然感觉比较单调但馅料够多，食落口感丰富，可能佢嘅用料比较似传统饺子，个人觉得比较出色。
饺子个汤就好清，饮落有啲似昆布汤，会有几条菜，一啲油都冇，以一间唔系饺子专门店黎讲，质素算唔错。
-
8️⃣ 班兰包 💰68（👅: 9/10）
班兰包
$68
133 浏览
1 赞好
0 留言
呢个班兰包虽然系包，但其实系甜点黎，系用斑兰叶汁做既甜品，外表非常吸引，系绿绿地色，一笼有八件。
外表系一个好似馒头嘅包，外层做得非常好，攞上手系好软熟，㩒落去仲会有回弹，所以佢唔系用发粉，而系自己发酵，咬落系松软轻盈，而且包皮用上粗麦粉，令人食完都觉得特别健康，食落系班兰嘅香味非常出，唔知系咪鲜窄出来既班兰汁，特别既香甜，入边嘅莲蓉馅系浓厚而且香软，莲蓉嘅味道会比班兰味更加重，甜度适中，加上个包唔系好大，所以食落一啲都唔会好饱滞。咁特别既斑兰叶包，真系唔系度度都有得食。
-
9️⃣ 芝麻糕 💰30（👅: 9/10）
芝麻糕
$30
120 浏览
1 赞好
0 留言
芝麻糕上枱时会登下登下，咬落轻盈，唔会好韧，又唔会好浆口，反而系好软滑，芝麻糕唔系干身嘅芝麻糕，而系偏湿润，好似食紧啫喱咁。
食落啖啖都系芝麻，芝麻多到系呈起沙状态，芝麻味好重好浓，但完全唔甜，食哂成旧都唔觉腻，未食过咁多芝麻既芝麻糕，而且系第一次食黑芝蔴糕入面有白芝蔴，加上黑芝蔴，绝对系最足料既芝麻糕，系我食过最好食既芝麻糕。
30蚊有4大件，但咁足料咁好食既芝麻糕系从来未食过，绝对系值得，系今晚最好食既菜色（其实系甜品）。
-
🔟 红豆糕 💰30（👅: 9/10）
红豆糕
$30
145 浏览
2 赞好
0 留言
红豆糕同样咁足料，以花奶做基调，糕底同马豆糕好似，食落系粒粒红豆，红豆落得够多，味道又甜又香，会食到香甜既椰汁味，因为系用十胜红豆，所以味道唔会太甜，不过整体会比芝蔴糕甜，好似食紧红豆雪糕咁。
-
1️⃣1️⃣ 马豆糕 💰30（👅: 9/10）
马豆糕
$30
96 浏览
1 赞好
0 留言
呢度既糕点除左可以堂食，可以外卖罗走，可以存放一星期，不过要摆系雪柜保存。
以为马豆糕会比其他两款逊色，点知唔系，马豆糕唔系白色，不过食得出有加到椰汁，而马豆唔系一粒一粒可以睇得到，而系已经磨成蓉混左入粟粉入面，所以唔系黄色而系白色，马豆食落系非常绵软，可以食得出马豆系由细软变成好似粉状咁，唔系只有软滑感，而系无比丰富既口感，整体甜度都系比芝麻糕甜，同红豆糕差唔多甜。
-
🌟食物质素来讲，绝对系我食过最好食嘅素食，就算唔当佢系素食，佢都系一个有质素嘅叫𩠌食饭，可以将素食做到化腐朽为神奇既境界，喺传统斋菜同创新斋菜中攞到一个平衡，比起我呢啲饕餮之徒，真正嘅素食者先系最大嘅受惠者，因为呢一间绝对系可以多次光顾嘅一间餐厅，夜晚价钱正常，好似同出边食打冷、大排档差唔多，啲𩠌嘅大细正常，平时可以嗌人头数既𩠌、或者嗌多一两碟，至于佢午市价钱就非常之平民，$50有三𩠌饭，加上例汤同任添既白饭同汤，夫复何求。呢度嘅炸嘢都几出色，食落唔会太油，而𩠌菜方面，有几道都比较多酱汁、比较重味一啲，好适合捞饭嚟食。今次黎食试唔到人气既椒盐炸鸡脾，代表我会黎第二次，餐厅营业到10点，比起市面嘅素食餐厅营业时间更加长，呢间绝对系我湾仔谂唔到食咩𠮶时嘅其中一个选择。
素食唔一定系大家想像中咁多油咁多汁，都唔一定系得老人家先会食嘅嘢，而家甚至有年轻化嘅趋势，当晚去到都唔会剩系得比较年长嘅食客，所以如果想尝试素食既，建议可以黎一试，一个上嚟食真系试唔到太多，如果想试多啲佢哋嘅招牌菜式，可以揾多几个一齐嚟食。
呢度嘅员工都好有礼貌，好好笑容，不过佢哋有一啲员工身体有缺陷，例如有听障人士，所以大家嚟到见到如果员工听唔到，唔好怪佢哋，就算就黎收铺，店员都系笑脸相迎，唔会催人走，叫大家慢慢食，呢种亲切既态度，唔系间间餐厅都有。另外呢度嘅老板娘非常好客，有时会出嚟同啲食客倾偈，又会好衷心咁问食客意见，绝对感觉到佢系好想搞好间餐厅，所有嘢佢都系亲力亲为，就连一啲好简单嘅洗梅菜嘅功夫都系佢负责，为嘅只系好想将美食分享比大家，净系呢一点，已经足以令我值得支持佢，喺生意唔好嘅时期，甚至再加上疫情影响，老板娘都坚持做好去嘅菜式，甚至好感谢帮衬嘅每一枱食客，系一间好值得香港人支持嘅小店，夜晚见到餐厅无坐满，甚至有时午市食客嘅数量系寥寥可数，实在唔想一间咁有心机既餐厅会从此消失。
有一次我去丽姐厨房唔系食嘢，而系买糕点，当日其实系父亲节，谂住去女朋友老窦屋企𠮶时买一啲见面礼，就谂到可以买一啲糕点上嚟一齐食，当日系星期日，因为喺网上见到佢系收三点，有落场时间，但我去到湾仔最快都要三点半，所以特登打电话问如果过咗三点仲可唔可以买，店员覆我话可以，于是我就上去。
去到餐厅见到熄晒灯，行到入去同店员讲话想买糕点，佢哋就即刻准备俾我，糕点都系落order个时先即刻切，所以我喺餐厅边行边等一阵，喺收银处就见到梁祖尧出嘅食谱，果然呢度嘅老板娘同梁祖尧好fd，应该系梁祖尧亲自送出有亲笔签名嘅食谱，之后喺等紧店员切糕点嘅时候见到丽姐，丽姐入厨房帮员工一齐切糕点，亲力亲为，而且好细心问我唔同糕点使唔使分开装。之后我就问佢系唔系丽姐，话系睇完梁祖尧介绍过嚟帮衬，之前已经嚟过呢度食过一次，佢好多谢我嚟帮衬，仲叫我介绍俾朋友嚟食，我绝对好乐意，虽然𠮶日系父亲节，但佢话其实夜晚唔算好多人。
当攞完糕点临走时，佢话今日父亲节，仲送咗两包乌龙茶茶叶俾我，佢话依啲茶叶系谂住送俾今晚嘅食客，非常有心，我多番多谢，承诺会将佢依间咁好嘅餐厅介绍俾大家，过嚟买几件糕点，但反而得到两包咁大包嘅乌龙茶叶。见到食物质素咁好、嘢食咁有心机去整，但反而晚市唔系高朋满座，觉得有啲可惜，唔知系地理环境唔算好好，定系大家对素食仲系好抗拒，但本来对素食冇乜好大兴趣既我，都觉得一间系值得再食嘅餐厅。
虽然依度嘅菜式无大鱼大肉，但看似平凡、以假乱真嘅素食，一样做到色香味俱全，满足度绝对唔比鲍参翅肚差，食到嘅除咗系好食嘅美食，仲系一份老板娘嘅热诚、热情同埋人情味。如果传统既素食菜唔乎合你口味，咁呢一间应该会令你大开眼界。
-
👅味道: 8.5/10
🍴环境: 7.5/10
💰消费: $140pp (服务费: 10%)
张贴
