MEMOIR (已結業)

一开始比餐厅名吸引到，memoir是指回忆录意思，就即刻book左位去试。餐厅环境昏暗，用咗大量干花装饰，加埋柔和灯光，非常有情调，适合情侣撑枱脚。好中意墙上一句「Don’t wander to what’s coming next, cherish this moment.」，意思系要活在当下，好岩我哋忙碌香港人。今晚见到好多人庆祝生日🎂，餐厅会有一个白色钢琴音乐盒播住生日歌，同埋有一束干花，上面有2人宝丽来即影即有相片，非常推荐黎庆生，而且性价比好高。今次叫左餐厅出名嘅龙虾汁蟹肉意大利饭，另外朋友拣左小食吉列牛肉薯饼，同埋日式芥末汁烧带子意粉。吉列牛肉薯饼炸得非常香脆，外脆内软，薯蓉顺滑，馅料食到牛肉味，好香口，配埋蜜糖芥末酱，酸酸地中和返油腻感。龙虾汁蟹肉意大利饭浓稠龙虾汁围住意大利饭，除咗有2只蟹脚，意大利饭入面仲夹住好多蟹肉，有惊喜，每一啖都食到蟹肉同埋龙虾汁鲜甜味，果然系餐厅推介。日式芥末汁烧带子意粉烧带子肉质厚实，酱汁味道有少许芥末香辣味，为意粉提味增香，同时提振食欲。