牛大人台灣火鍋吃到飽 (銅鑼灣廣場二期)

营业中

休息中

前几日同朋友二人黎咗食牛大人晚餐火锅，入面啲座位好宽敞，坐得舒适。今次拣咗澳洲极上和牛套餐，汤底就牛大人秘方麻辣锅中辣。呢个套餐有多款肉类可以点，而我地就最期待牛小排、和牛M5牛肩卷同埋期间限定嘅北海道十胜豚！手机落单后几分钟就上菜，好有效率。牛肉脂肪分布平均，沾埋牛大人特制酱汁食非常开胃。个汤底辣得黎带有麻香，除咗肉类之外其他配料就咁食都有汤头浓郁味道。蔬菜同丸类配料可以自己出去夹，都有好多选择，包括少见嘅蕃薯叶，香芋贡丸等。个贡丸系我每次同朋友黎都必食嘅！除咗有猪肉香外，佢有粒粒芋头系入面，令到整体口感松软啲唔会太硬实。海鲜类我地就试咗海虾、鲷鱼片等。入口冇海鲜雪藏腥味，肉口感扎实而有海鲜甜味。建议食多咗红肉嗌吓鱼片调剂番，因为佢清爽得黎令人好有胃口啊！我地有试牛大人嘅黑糖珍珠鲜奶，每人加$25就有，同出面手摇店嘅一样咁靓，有黑糖挂杯纹路，打卡一流。牛奶同黑糖比例岩岩好，食紧辣火锅嘅时间饮一饮就好解辣同解渴，啲珍珠煲得香甜烟韧，不经不觉就成杯饮哂。下次有朋友聚会都会想黎再食啊！环境舒适，上餐速度又快，大家都食得开心。