阿爺八鮮鍋

营业中

休息中

任食火锅食得多，但连海鲜都有得任食就比较少见，下午5点入座，任食2.5个钟连加一都只系每位大约$400，所以呢间火锅好抵食！呢度嘅火锅套餐好丰富，开头有个五指毛桃猪骨炖汤，好香好清甜，饮得出系好足料嘅老火汤，份量应该系两碗有多。之后就系一个特色鸡煲，我拣咗四川麻辣鸡煲，鸡肉充满酱汁，够淋够入味，唔算好辣。跟住系一个刺身拼盘，摆盘好精致，刺身款式多，有毛蟹、甜虾、八爪鱼、希灵鱼、蟹子沙律、带子裙边，全部都好新鲜，而平时我唔食嘅希灵鱼，呢度都好鲜甜，冇怪味，几唔错。终于到打边炉，本身以为汤底系就咁加汤落个鸡煲度，点知原来呢度嘅火锅汤底系另外再上，所以我拣咗椰子鸡汤底，清清地可以食到海鲜嘅鲜甜味。一开始有个霸王海鲜盘，有齐大部份海鲜：越南大虎虾、澳洲大龙虾、苏格兰圣子、苏格兰大元贝、台山奄仔蟹、新鲜鲍鱼。之后我同朋友再点少少安格斯牛肉、黑豚肉、墨鱼滑、菜同丸类，基本上已经超级饱，冇quota再叫海鲜，而呢度出前一丁亦有好多味拣，好夸张！我同朋友仲每人加$20蚊，可以任饮啤酒同饮品。钟意食海鲜火锅嘅话可以考虑呢间，一定比逐碟叫嘅火锅抵食好多！