柳氏家 (已結業)

前两日去一个住荃湾西嘅朋友屋企探佢只猫猫，上去之前我地一齐去左荃湾广场呢间有铁板鸡又有烤肉任食嘅餐厅食lunch。Lunch每人$158加一就有90分钟任食，食物选择都唔少。点完铁板鸡同烤肉之后就出去夹下熟食去食住先。熟食有鱼糕汤、炒高丽菜同埋炒粉丝等等。朋友最钟意就系食炒粉丝，唔太油，都几好。有任食嘅铁板鸡系呢间餐厅同其他韩烧唔同嘅地方。铁板鸡有三款味道，分别系柳氏家辣炒鸡、蜜糖味增炒鸡同埋烤肉味炒鸡。我地净系点左头两款，两款都几好味，除左鸡之外仲会有啲菜、大葱同埋年糕喺入面。柳氏家辣炒鸡辣辣地好惹味，蜜糖味增炒鸡就甜甜地，我就比较钟意食辣嘅炒鸡。烤肉方面有牛、猪同埋海鲜。我同朋友都一致认为豚梅肉最好味，因为腌得入味，烧完都几滑嫩唔会韧。有烤肉汁同辛味烤肉汁嘅拣，烤肉汁就甜甜地，辛味烤肉汁就浓味少少。出面仲有得自己夹其他烧烤配料，朋友最钟意就系芝士年糕同埋蕃薯年糕，烧一阵就食得！仲可以点炸鸡食，系逐件逐件咁点嘅，新鲜炸起热辣辣。有甜辣炸鸡、大葱炸鸡同蜜糖芥末炸鸡。不过我觉得啲酱汁就比得多左啲。最后可以自己出去装雪糕食，不过我地太饱就冇食到啦。