高麗軒韓國料理 (已結業)

近排成日食烤肉，不過好耐冇食韓式烤肉啦，見呢間餐廳就係尖沙咀，位置方便，又唔貴，就去試吓。平日夜晚279加一，不過我哋加多68，就可以食好啲嘅牛同埋有帶子😋加拿大雪花牛有分prime同3A兩種，一種醃過，一種就冇，醃過嘅比較嫩，個汁甜甜哋，都幾好味，冇醃過嘅就食得出原本嘅牛味，兩種脂肪都唔算太多，咁嘅價錢可以任食咁嘅質素都算好唔錯😊帆立貝、帶子兩樣都幾新鮮，又幾大粒，燒完都彈牙，帆立貝有加蒜蓉，所以燒完都幾香，唔錯。特級牛勁肉呢個牛勁肉唔洗加68都有，質素都好唔錯呀，脂肪比例好好，重牛味又易入口，記得叫嚟試吓。牛仔骨牛仔骨都係醃過嚟，幾入味，又易咬，唔錯，不過叫咗半份都俾咗5大塊我哋，份量好足。肉眼扒肉眼扒比較厚，唔知係咪我哋燒耐咗，有啲韌，相比之下，冇其他牛好食。除咗燒肉，仲有好多其他嘅韓國菜食，例如前菜、拌飯、湯、炒粉絲、海鮮餅。。。但係份量太多，所以我哋唔敢叫嚟試，淨係叫咗個海鮮餅，雖然入面海鮮唔算多，不過又幾好味。另外仲試咗幾款前菜都好ok，正常韓國菜嘅質素。咁嘅價錢可以食到咁多樣嘢，都算好抵，如果人多就更好，可以叫多啲share食。