肉搏食堂 (已結業)

我同朋友都几钟意去厚福街揾食，今日就拣咗去呢间食丼饭嘅肉搏食堂。呢度主力就系做丼饭，有刺身丼亦有熟食肉类嘅丼饭选择。平时我比较钟意食刺身丼，不过今日天气寒冷，所以想转一转口味，就拣咗慢煮黑豚盛丼。呢个黑豚丼分别有150g同200g选择，我就拣咗细size，其实份量都唔少。以慢煮方式制作豚肉令肉质非常嫩滑可口，上面淋上芝麻酱，加上鸡蛋，再洒上葱花，真系色香味俱全。而入面嘅饭亦淋上另一款酱汁，由外至内都咁丰富。另外我哋仲拣咗慢煮顶级牛肉盛丼，因为太钟意食牛肉，所以呢个丼就拣咗200g。牛肉呈半熟状态，配上牛肉酱汁，同样地加有鸡蛋，混合夹配嘅忌廉芝士，非常鲜味。另外拣咗日式豚肉饺子作小食，饺子属于自家制，煎得金黄色食落够甘香。饮品非常打卡able，蓝莓青柠梳打呈深紫色，上面插上小花，睇落迷幻而味道清新。紫薯鲜奶嘅渐变紫色非常吸睛，而且仲啖啖带有紫薯香味，越饮越开心觉得甜丝丝。