豚王 (已結業)

星期六，谂住睇戏前食个拉面打个底。男友系一兰fans，一心谂住6点左右应该能够避开人潮。点知都系要排长龙，睇个样最少排1个钟。唯有转阵去食附近既豚王。对于我黎讲，我个人钟情豚王多d，佢既汤头猪骨味味道够浓得黎又冇一兰食完之后咁口干。我叫左豚王加5份辣，通常系食之前我都会饮啖汤，试真d先。佢既叉烧都够滑，厚薄刚好吸到汤。有d 拉面店整d 厚厚既烧叉烧，感觉好似丰富，但食果阵旧肉就难d 挂汤或者吸收汤既味道。佢面既份量都够，冇好似隔离一兰咁得2啖。我地仲加左只味付蛋，佢只蛋甜酱油味道岩岩好，系蛋黄中有少少过熟，但都仲系流心既。佢个辣大豆芽配菜都系我同男友争食既目标，虽然佢只系配菜，但都好用心整。味道层次好丰富，大豆芽入味得黎，不失爽口。微辣口味好开胃，拉面食到一半食一啖大豆芽有消腻既效果。其实尖沙咀豚王水准比初初开果阵越黎越稳定，但点解一兰排到吓死人，呢到得几个排队呢？可能自由行天书冇吹捧，等我仲可以唔使排成个钟先食到碗面。