禮記 (已結業)

今日同个朋友去将军澳食饭。点解会去果边食饭？因为之前见到啲介绍，将军澳嘅礼记有个企起身嘅嘅肉丝脆面。睇到时觉得好得意同好吸引，所以就去咗啰。一入到餐厅，地方宽敞舒适，感觉相当好。作为一间中餐馆，当然系先叫茶啦，我哋拣咗比较特别嘅玫瑰荔枝茶。茶杯典雅，茶味清香。瑶柱鱼滑上汤浸时蔬，睇落好普通？都唔算㗎。除咗明显见到嘅鱼滑同小棠菜，仲有瑶柱丝、冬菇粒、同埋姜丝。上汤味浓，鱼滑打牙鲜甜，再加上冬菇粒带嚟嘅口感，整体来讲，虽然系普通嘅中菜，但绝对系好好味嘅菜式。杭州东坡肉，我特登点嘅。东坡肉虽然系好肥好邪恶，但绝对系唔会成日食嘅菜式，所以一次半次，绝对唔会过分。东坡肉肥瘦分明，入口即融，而且汁酱爽甜唔腻，减轻咗东坡肉嘅肥腻感。奉劝大家，叫得东坡肉，就唔好怕肥，记得要连埋肥肉一齐食先好味嫁。银芽肉丝脆面，是日最期待嘅菜式。企起身嘅肉丝脆面，真系好正，影相打卡一流。当你影好相喇，店员就会帮你淋上汁酱同为依个肉丝脆面解体。铁板上嘅原故，所以脆面落返平面，淋完汁酱，都好热返，唔会话入口冻冰冰。汁酱调味唔错，就算唔系谂住影相打卡，都值得点嚟食㗎。