一茗堂 (南山商場) (已結業)

休闲精美西餐@南山村去南山村除咗打卡之外，依道都几多好嘢食㗎。今次就去咗依间新开西餐厅医下个肚，环境都几开扬，而且价钱唔贵，一于试下新嘢，自制一点本地旅行渡假 feel～Weekend 同样有Lunch Set，我哋点咗两个套餐同埋时令蔬菜。午餐送是日手打餐汤或者田园沙律，我哋就各拣咗餐汤同沙律。田园沙律嘅份量都唔少，salad dressing 系黑醋汁唔肥腻，啲沙律菜都好清爽。餐汤系番茄忌廉汤，酸甜开胃，质地够晒creamy。香煎帆立贝墨鱼汁意大利粉四边用车厘茄点缀得好靓，帆立贝几大只鲜甜，意粉亦煮得相当有水准。味道浓郁嘅墨鱼汁充分包住意粉，每一条都乌卒卒，食落好惹味！ 焦边荷包蛋堪称完美啊，令招牌鸡扒煎蛋配白饭嘅卖相大加分。厚身鸡扒十分重量级呢，鸡皮带少少香脆口感，好好食又啱哂送饭。另外点咗蒜蓉白酒炒杂菌，蒜蓉味好香好浓，简简单单但意料之外咁好味！甜品叫咗个法式啤梨焗挞加云呢拿雪糕，个挞弥漫住新鲜焗起𠮶种饼香。梨肉清甜，热腾腾嘅啤梨挞配透心凉嘅云呢拿雪糕，实在系依个周末嘅小确幸。