Plato Cafe & Bistro (吳松街)

成日喺呢边按摩揼骨，经过咗呢间好多次，今日就过嚟试吓。见到有个二人餐都几抵食，份量几多，$498两个人。前菜拣咗黑松露薯条，估唔到配咗个芝士酱同茄汁，个芝士酱超级好食，而家已经好挂住。餐汤喺南瓜忌廉汤。叫咗个带子白汁扁意粉，超多配菜，有三色椒同埋芦笋，带子都有三粒，煎得好香，而且超多白汁好好食。另外仲叫咗个肉眼扒，五成熟都系煎得啱啱好，肉质好嫩滑，仲有个焗薯蓉配沙律酱，我朋友超级钟意食。而且配菜仲有翠玉瓜，份量都好多。甜品今日系芝士蛋糕，或者雪糕。纽约芝士蛋糕都好出色，仲要雪糕系movenpick ，超级惊喜，拣咗朱古力超正。餐饮包两杯$32嘅饮品，叫咗一杯水果茶，一杯冻柠茶，好少喺出边西餐会饮到水果茶，都好好饮。呢个价钱食到呢个质素，超级抵食，下次会试埋佢个心太软。