源記餐廳 (已結業)

星期日晨咁早起身做运动咁辛苦，梗系要食番个靓早鼓励下自己。因为做完运动有啲热，唔想食有汤粉面嘅餐。行到大围，早上8点几嘅源记人少少，加上佢有西式早餐，一于入去食。西式早餐我拣咗炸鱼、烟肉、炒滑蛋，配茄汁豆、薯饼、多士，仲有热饮(我叫咗茶走)都只系$38。喺等紧食物之际，有位刚入餐厅女士疑似有脚伤，因为不断听倒有店员哥哥叫佢小心啲行、唔使急，都几温暖。炸鱼外皮略嫌炸得太㶶，但鱼肉就刚好熟，鱼柳仲系好多汁，如果可以用小量盬同胡椒粉腌肉后再炸会好味啲。烟肉煎得唔够㶶同脆、炒滑蛋就刚好熟又够滑。多士有啲喜出望外，半片厚切，焗得脆而不干，简单配牛油，好味。茶走太多奶，令到茶味相对淡。