峴港越式料理 (已結業)

其实我对东南亚菜系都好中意，越南菜更系继泰国菜后又一喜爱菜系。寻晚就同男友去左间位于工厦楼上嘅越南菜。本身对工厦环境都无咩期望，不过去到见到真系有惊喜！个环境好光亮整洁，而且枱櫈都带有点点嘅法式风味。我地见椰青海鲜汤好似好吸引，所以叫左试下。果然一上枱就闻到好香椰子味，而且个汤饮落好清甜，不过由于有黑胡椒，略带微辣。入面有鱿鱼、青口、椰肉同一只大虎虾，质素唔错。小食拼盘有扎肉、鸡翼、牛肉、猪颈肉、鱼饼、春卷等。每样都好新鲜，牛肉唔会韧，好松软; 鱼饼好大一块，好厚身，表面煎到金黄色;  猪颈肉肥瘦适中，好爽口;  春卷表皮好酥脆，入面馅料口感丰富; 鸡翼不过不失。越南法包都系第一次食，以为会好干好韧，点知一咬落去个面包表皮好酥脆，入面好软身。而且馅料好丰富，有牛肉、扎肉同好似系鹅肝酱嘅酱，食落口感好丰富兼带少少湿润感。呢杯越南咖啡也是令人意外之物，估唔到蛋黄加系咖啡上面一齐饮，口感会咁creamy同滑溜！不过要留意嘅系唔好煲咁耐，咖啡会愈煲愈浓而蛋会凝固。男友话呢杯越南咖啡味道香浓好好饮。