點心到 (廟街)

营业中

休息中

今日专登出佐敦买厨房用具同冲咖啡用品，行足两粒钟，走匀几条街，又攰又肚仔饿之余，又话今晚即将转八号风。即刻嗱嗱临揾下附近有的乜嘢好食。见到大大间「点心到」，新派装修饮茶食点心餐厅，一于叹番杯茶，食番一盅两件。点心选择种类都多，除点心、有笼仔蒸饭，仲有炖汤同甜品。另外，如果唔想饮中国茶，亦有各式汽水，或者可选择咖啡、奶茶、柠茶等等。《晶莹鲜虾饺》、《原只虾烧卖》系必食，果然烧卖只虾好够大只，鲜甜爽口弹牙。虾饺都皮够薄滑。最正系有两粒或四粒拣，两个人拣两粒，就吾使惊食唔晒。《豉汁蒸凤爪》、《上海小笼包》、《黑松露菜苗饺》同《浓汤鲜竹卷》，每款都系阿仔同我喜爱，整体上水准都唔错。加上最紧要即叫即蒸，上抬够热就更加好味。最后加多个《杨枝甘露》甜品，话时话好耐冇食。呢个都吾错，足料够香甜。相比一般酒楼，呢间点心系全日供应，一想食就可以嚟食。吾使好似以前，要一大清早起床去攞位。任何时候想食点心、饮番杯茶，呢间的确系不错选择。