七福神和食亭

营业中

休息中

今日我去咗佐敦楼上一间日本餐厅，超级抵食，食个好满足！我同朋友叫咗个二人餐，先嚟蚬肉味噌汤，蚬肉好大粒，令味噌汤更加鲜甜。之后系刺身三品盛合，有带子、三文鱼同甘虾，刺身厚切又肥美，特别系三文鱼，油脂感充足。另外叫咗左口鱼，同样鲜味。香菇野菜炒，加咗木鱼同洋葱，炒得好香，而且份量好大。和风碳烧汉堡扒，汉堡好厚好大块，肉味香浓，食到真系好满足。香川盐烧鲭鱼系另一个亮点，鱼肉厚实，鱼皮烧至焦香，而且本身有少少盐调味，加埋柠檬就已经好惹味。和风珍味拼盘，有我好钟意食嘅中华沙律同螺肉。石锅香蒜牛肉饭，香气扑鼻嘅蒜同和牛，当然唔少得饭焦。虽然二人餐好丰富，但系我哋太肚饿，口痕叫咗西京烧鳗鱼串，好大条嘅鳗鱼，上菜嘅时候大家都惊叹～鳗鱼肉质弹牙，酱汁甜甜地，鱼皮烧到小小脆，非常出色。牛舌，既厚身又惹味，用咗黑同椒盐调味，弹牙嘅口感令人回味。最后，我叫咗柚子生忌廉吉士芭菲，甜得清清地唔会太腻，简直系完美结束。朋友叫咗鲜忌廉绿茶，鲜忌廉嘅味道好特别，捞埋绿茶饮出奇地夹。