翠華餐廳 (已結業)

我知翠华有好多fans，而且佢哋都越做越成功，单睇中环啲分店开得咁密就知，但本虫就真系唔系咁欣赏。好似今次心血来潮嚟依度食下午茶，啲套餐真系唔系咁吸引，我揾云个餐牌竟然连最大路𠮶啲鸡脾呀、薯条呀、咖哩角之类都一概揾唔到。不过当问个侍应时佢又话梗系有，咁我叫佢指出嚟喺餐牌边度有写，佢最后竟然指住沙律类，话鸡翼沙律原来可以改做鸡翼薯条，而且价钱仲平啲，真系估佢唔到。讲返啲嘢食，鸡翼薯条嘅份量好少，薯条都唔知有冇十条，而且唔系一般港式𠮶只，而系懒高级𠮶只美式粗薯条，鸡翼虽然有四只，但系系最细𠮶种，而且有雪气味，最攞命系唔包饮品，另叫柠乐五十蚊都落唔到楼，心谂早知过去美心大家乐，分分钟食到三个下午茶餐。至于服务都算系翠华最港式嘅一环，是关都系𠮶种高效率但无笑容嘅典型侍应咀脸。由于一份餐食唔饱，我唯有加多份西多士补飞，但西多士里面竟然冇花生酱，真系唔知翠华点解可以叫自己做最港式嘅茶餐厅，在我眼中似系呃鬼佬多啲。