荔園茶餐廳 (已結業)

荔园并唔系我嘅童年回忆，佢消失嘅时候我都系得几岁，所以点解会行入黎，其实都系朋友话个焗猪饭好食。本身以为用得荔园主题就实系好多同机动游戏有关嘅摆设，所以我连要坐海盗船系食饭嘅心理准备都做埋，冇办法啦，焗猪㖞。好彩，呢间餐厅真系一间餐厅，同荔园有关嘅就系天花板嘅马，门口只老虎仔同埋墙上嘅画。坐低左叫完野大约十几分钟碟饭就到左。由于我十分肚饿，求奇影张相就开始食。讲个焗猪之前讲下个奶茶，整体黎讲几好饮，茶味够浓，中意茶味浓嘅朋友可以试下。讲返个焗猪，面头芝士唔算多，唔会抢晒风头；蕃茄如果系切一旧旧会更好，但亦不失新鲜，茄汁味道亦唔会太假；饭底有炒过，值得一赞嘅系蛋量充足，唔系做下样，但饭身略嫌湿咗少少；猪扒大小同厚度都适中，一食落口就知道有用锤仔Dup过，口感好好。成个饭嘅份量都几多，食完都有八、九成饱。加上呢度算几好坐，虽然冇乜荔园共鸣，但都值得一试。